ارجوكم ساعدوني

االسلام عليكم يا اخواني انا السنة ان شاء الله رايحة نعدي الباك و بديت نقرا الدروس الخصوصية في الرياضيات و في الفيزياء لاني شعبة علوم تجريبية مشكلتي اني بديت نخاف من ضرك كل يوم نتخيل روحي في يوم الامتحان و ليلة النجاح و لوكان ما ننجحش كفاش ندير الوساويس اكل بداولي من ضرك و راني خايفة لا هذه الوساويس تؤثر عليا في القراية حتى نولي ما نركزش و انا مشكلتي الكبيرة هي الفيزياء ما نفهمهاش طوووول و الرياضيات شويا نفهم الدرس مي في الامتحان ما نحلش مليح و الله راني خايفة لا ما ننجحش ساعدوني من فضلكم وش ندير و لكان واحد فيكم عدا الباك يقولي كفاش دار من فضلكم انتظر ردودكم و جزاكم الله الف خير سلام

هدي ختي علاه راكي تقلقي في روحك
امتحان شهادة البكلوريا صح هو امتحان مصيري مي هو يبقى فالنهاية مثل باقي الامتحانات راجعي مليح حضري لدورسك كيما يلزم الحال ونظيم وقت للمراجعة وقت للراحة واكيد راح تنجحي اختي الخوف والقل اكيد راح ياثر على نفسيتك وبالتالي ميراجعيش مليح ويقعد هاجس الفشل هو الييسيطر عليك
انت صح شعبة انتاعك صعيبة مي راجعي مليح وحاولي تدعمي نفسك فالمواد الي ضعيفة فيها كاين بزاف معلومات فالنت حاولي تستفيدي منها

هدى اختي متخليش وسواس يسيطر عليك وتقلقي فسك وتعبي اعصابك من درك ديجا السنة دراسية راها قريبة لازمك نفسيتك اتكون مرتاحة وعقلك ثاني باش تركي على درورسك والمراجعة وتنجحي ان شاء الله
اتمنى ان اكون افدتك ولو بالقليل

ان هادي مدة ملي جوزت الباك نجحت في اول مرة راجعت مليح وحظرت كيما يلزم الحال اختي

ناجة ان شاء الله
ربي معاك

لكي تحياتي اختي لعزيزة

شكرا لك اسماء ربي يعيشك على النصائح الجميلة والله نحيتيلي شويا على خاطري ان شاء الله ندير كيما قلتيلي و ان شاء الله ننجح و العام طويل ان شاء الله في العام الدراسي كشما نحتاج نقولك لتدعميني بنصائحك سلام

راني هنا اختي كي تحتاجي كاش حاجة نقدر عليها وعلاش لا لا


بإن الله تنجحي اختي لعزيزة

شكرا لك اختي اسماء كلك ذوق

اختي هدى ننصحك ماتديريش الي درتو انا
انا هاد العام خسرت الباك مع اني من التلاميد الاوائل والسبب هو اني خواااااافة بزاف والباك عطيتو كثر من حقو كنت نقرا كثر من اللزم والليل كامل منرقدش نبقى نفكر ادا ننجح ولا لالا
المهم اختي ننصحك باش متديريش ليكور في العطلة ريحي فيها والباك بديلو من النهار الاول بصح كيما قتلك متعطيلوش كثر من حقو ومتضيعيش الوقت نتاعك ديري استعمال الزمن بديه من الشهر الاول نتاع الدراسة
المهم اختي ديري ربي في بالك وهاد مش وقت للخوف نحيه من بالك وقولي الي كتبها ربي نحمدو عليها
وانا نتمنالك النجاح واي شي تحتاجيه راني هنا انا تاني كنت علوم تجريبية وغادي نعاود الباك ونتمنى ننجحو في 2
وكيما قتلك اي شي تحتاجيه راني هنا
نتمنالك التوفيق

ان شاء الله ربي يخليك يا فطومة و اي حاجة انتي تاني تحتاجيها قوليلي و ان شاء الله ننجحو مع بعضنا هو انا يعني مش خايفة خايفة مي شويا ساعة ساعة وين نقعد مع روحي نقول لكان ندي لكان ما نديش راكي تعرفي ههه المهم اللي فيه الخير يكتبه ربي ان شاء الله
تحياتي ليكي و شكرا جزيلا لك
و صح رمضانك

يسلمك حبيبتي
صحا رمضانك انت تاني

شكرا لك عزيزتي و الله درتيلي الكوراج اسماء تاني شوي خففت عليا
شكرا لكم و الله مكانش قد اولاد بلادي العزاز
تحياتي ليكم يا بنات اللمة

بارك الله فيك

ما تخافيش إنشاء الله جيبيه رانا قاع ندعولك

شكرا لك عزيزتي ان شاء الله

كلنا جنبك يا هدى انت راجعي وحنا ندعولك

ان شاء الله شكرا لكم كلكم

السلام عليكم
بالتوفيق اختي

السلام عليكم
أختي يوم الإمتحان عند خروجك من البيت إحملي معك قليل من السكر كل قليلا ومري الأخر وذهبي فنحن ورائك بالدعاء
وإذا كن معك ماء زمزم إشربيه لأنه فيه بركة
والله معك
أسف على مساعدة البسيطة
ولكن جربي كما قلت لك

هههههههههههههههههه فكرة السكر هادي كانوا يستخدموها جداتنا لقدام وهي فكرة ممكن تنفع والاسلس فيها تاكلي حاجة كلوة باش عقلك ينشط
تحياتي ليك
وبالتوفيق

شكرا لكم بارك الله فيكم
ان شاء الله نديرها نهار الباك و انتوما ادعولي
اسماء قوليلي وشراكي ؟